可能唔少家長都會有共鳴，就係小學生嘅數學能力，一係完全唔需要人哋擔心，自己一理通萬里明，一係就好似牛皮燈籠咁，點極都唔着。的而且確，如果係數學上唔係特別有天份，咁係數學科上面嘅進步就真係只可以靠操練而黎。但係，亦都要避免過分操練，要有技巧咁樣教導小朋友，先至可以更加有效率咁樣係數學上面取得成績。今日就等Tutor Circle尋補為家長分析下，小學數學到底有咩小技巧啦！

過程比答案更重要

圖片來源

唔少家長係為小朋友檢查數學功課嘅時候，會直接出「外掛」，即係用計數機計答案，如果答案唔正確就直接叫學生重做。

其實係數學上面，過程遠比答案重要。數學講求嘅係思維能力，學生一定要明白數字之間嘅關係同埋正確嘅運算過程，如果有足夠嘅了解，最後答案錯誤只係因為唔小心或者計錯數，咁其實問題不大。反而如果學生唔知道點解錯，或者一開始就唔知道應該要用咩方法去計算，咁樣家長可能就要重新細心咁樣解釋題目。

睇返市面上嘅補充練習，其實有唔少題目都要求學生直接比出答案，其實家長可以要求學生，將列式寫埋喺隔離，咁檢查學生答案嘅時候就可以知道學生嘅思考過程，更加快咁樣搵出問題所在。

二學生係列式嘅過程，亦都可以理清自己嘅思考，唔會出現計得十分混亂嘅情況。

日常心算

圖片來源

大多數小學都唔會比小朋友用計數機，因為要訓練小朋友嘅心算能力，唔可以過分倚賴電子產品。有唔少家長係訓練小朋友心算或者計數嘅時候都會遇上難題，小朋友唔小心計錯數，或者背咗乘數表，其實除咗叫佢哋死記硬背之外好似真係冇其他方法。

不過，家長可以用一啲吸引小朋友嘅方法去訓練佢哋日常生活之中都做到心算。以小編為例，小學嘅時候每逢週日就會同屋企人去茶餐廳食早餐。準備買單嘅時候，爸爸都會將張單帶俾我，要我計三個人嘅早餐加埋係幾多錢，然後比紙幣我直接去埋單，如果計得啱，找續就會係我嗰個禮拜嘅零用錢。

當然啦，爸爸一早已經計好咗，其實正確嘅找續只會有兩三蚊，唔會太多。但係咁樣無傷大雅嘅小練習，可以為小朋友提供學習嘅動機，日常生活化嘅學習亦都較容易喚起佢哋嘅興趣。

圖形與空間

圖片來源
另外一個小學數學重要嘅題目就係圖形與空間，小學生要對幾何圖形有基本認識，為日後學習面積同埋體積建立基礎。

圖形與空間係一樣喺課室同埋喺課本上面教難掌握嘅題目，家長可以善用日常同學生嘅相處，以直觀、實際操作等嘅方式，去學習，例如分類、摺紙、圓形分割及拼砌等。

朋友亦都要從小培養佢哋嘅空間感，要認識唔同嘅圖形、形狀互相位置嘅關係，而呢啲係日常生活中其實都可以輕易做到，例如喺超市買完雜貨之後，比較輕嘅貨物可以交俾小朋友擺上櫃入面，可以比一啲簡單嘅指令例如要將麵包放喺生果嘅左邊，較大嘅生果要放喺生果籃嘅下面，細啲嘅生果就擺返喺上面等等，已經可以訓練到小朋友對於圖形嘅掌握。

總結

小學入面教授嘅數學，雖然程度唔可以話簡淺，但係比起中學教嘅高深題目已經好好多，家長一定要趁住呢一段時期，為小朋友打好數學嘅基礎，訓練佢哋嘅頭腦思維，咁樣入到中學嘅時候先至可以更容易掌握。

【延伸閱讀】【各大院校收生要求2019】究竟入大學有咩要求？
【延伸閱讀】E-App點樣交錢？報完E-App仲洗唔洗報Jupas？
【延伸閱讀】dse計分 – 同分嘅情況下邊位考生會有優勢?

**現在從Blog 下方按鈕轉載到 Tutor Circle 尋補網站，並輸入優惠碼 ”TCBLOG2020“ 即可有$20學費減免，事不宜遲，馬上去搜索適合導師上課吧**

此文章純屬 Blogger 個人分享，並不代表本網誌立場。