【家庭教育】童年陰影影響一世！三大經典誤區要留意！

Post author:Estherccy
Post category:小編分享
Post published:2020-07-27
Post last modified:2023-06-09

「可憐天下父母心」，做父母嘅，當然係想俾最好嘅小朋友。但其實家庭教育係一個重要課題，方向錯誤或者教育缺失，都會對小朋友成長發展有重大影響。大部分家長都係新手父母，身教言教上難免出錯，今日就等Tutor Circle尋補同大家分析下三個普遍香港家長對家庭教育嘅誤解啦！

1. 過度保護

家庭教育
圖片來源

香港生育率一向唔高，近年更有下跌趨勢，大部分家庭都係一個起，兩個止，家長大部份時間同注意力都擺左係一個小朋友上，難免會出現過份保護嘅情況。

例如早年就曾經試過有港媽因為孩子參加足球訓練班，守龍門不慎發生意外，被其他小朋友踢傷眼睛，即使男童傷勢不重，無永久損傷，視力未受影響，仍向球會索償十二萬元。

呢個係香港家長常見嘅誤區，其實任何活動都有一定嘅風險，更何況體育運動，係合理情況下，小小碰撞實在難免，過度保護嘅家長會令小朋友性格變得膽小、缺乏自信，日後無法面對困難。

因此，家長必須明白，適當嘅關懷係好事，但過份干預則會妨礙小朋友嘅身心發展。

2. 嘲笑挑剔

家庭教育
圖片來源

嘲笑挑剔可以話係傳統中國父母嘅經典誤區。每當大時大節，三姑六婆聚首一堂，傾嘅話題離唔開自己嘅小朋友，總會順便提下小朋友嘅瘀事，當成笑料同親戚分享。

其實呢啲事情，對家長黎講係小事，無傷大雅，但對小朋友黎講，會覺得丢臉，傷害自尊。小朋友嘅自尊心一旦受到傷害，會需要一段長嘅時間去恢復，甚至永遠無法重新建立。而呢啲小時候嘅小片段，大人可能幾日後已經唔記得，但係對小朋友來講，會留下一世嘅陰影，難以磨滅。

所以，家長最好避免用小朋友嘅過失或者小缺點作為談資，以免傷害小朋友感情。

3. 身教言行不一

家庭教育
圖片來源

所謂「身教重於言教」，其實小朋友最主要係透過模仿你學習嘅，所以小朋友係睇父母所做並非父母所說，如果家長講一套，做一套，會為小朋友帶來十分困惑嘅指導。

舉個簡單例子，大部份嘅家長都唔希望自己嘅小朋友投放太多嘅時間喺電子產品度，覺得會睇壞腦，又會令到注意力散渙。但如果家長係責怪小朋友嘅同事，自己都係機不離手，一邊設立規矩，一邊破壞規矩，小朋友自然會覺得規矩都唔係咁重要。

子曰：「其身正，不令其行；其身不正，雖令不從。」父母要言行一致，小朋友先至可以表裏如一。