【自學結他】有咩好方法？教你四大途徑！

Post author:小雲
Post category:吃喝玩樂
Post published:2018-11-14
Post last modified:2018-11-14

「嘩～男神BB好有型啊～可唔可以教我彈結他啊>_<」相信每一個女仔心入面，都對「結他」呢一樣樂器有獨特嘅情愫。無論係木結他定電結他，彈緊嘅係ballad定係rock，總之拎住部結他就係型！唔少男生係中學嘅時候，相信都會想學個結他耍個帥，務求奪得女神BB嘅芳心！尋補Tutor Circle教大家追女仔，啊！唔係，教大家彈吉他。

結他呢個看似簡單，實際確實不難嘅樂器，的確係初接觸音樂，同埋容易上手又可以型到嘅最佳選擇。所以唔少人都選擇自己揀部夠型夠靚嘅結他，然後自學！自學都學得識嘅話，朋友仔知道左就更加型上加型啦～而家就介紹一下自學結他嘅幾個途徑比大家參考～

1. 向朋友學習

每個人身邊總有幾個朋友係中意玩音樂嘅，先向身邊識音樂嘅朋友學習基本嘅音樂知識，起碼要識得咩音打咩音，有個音樂基礎先可以開始學習點樣彈結他架！千祈唔好心急求快，想要一步登天！學識睇譜同基本嘅樂理，就可以請你嘅好朋友同你一齊拎部結他出黎，手把手咁指導你正確嘅姿勢，同埋唔同嘅音嘅位置，仲有點掃chord架喇～
自學結他

2. 上網睇教學文

如果你冇朋友，我嘅意思係咁岩冇識得結他嘅朋友，又或者想靜靜地一個人在家修煉，有成果先拎出黎比大家睇嘅話，網上都有好多詳細嘅教學文，中文嘅又有，想同時練習下英文的話打guitar learning/guitar beginners都有唔少清晰又高質嘅教學文。睇文章嘅好處就係佢可以幫你有個general嘅理解，明白左成個流程係點做，然後再逐part逐part針對性咁練習～
自學結他

3. 睇YouTube教學片

若果淨係睇文字未能令你明白嘅話，不妨去YouTube果度search結他嘅教學片，一樣係語言大把選擇，但最大嘅問題就係YouTube上嘅片質素比較參差，大家可能需要花多啲時間去篩選有質素嘅片，大家可以留言下views數同堆likes數，正常較多嘅都會係比較好。同埋每個人嘅教學方式都唔一樣，A好多人都中意但未必一定岩你，B可能冇咁高評分但係佢講嘅野更容易令你明白，所以要因番自己黎揀選你嘅老師喇～
自學結他

4. 結他學習App

而家個個都揸住部智能電話，食個飯落單都要用App，連學結他都有App呀！唔係時時刻刻都可以有部結他係身邊，但係download左個App，你就可以時時刻刻都練習結他！有幾個App都非常受結他愛好者推介架，例如Justin Guitar by FourChords, Yousician Guitar, Piano & Bass, Coach Guitar等等，都可以協助你出左門都學到結他，隨時隨地搭緊工又得，去緊廁所亦得，行緊番屋企都得，得左！

睇完仲唔拿拿臨去攞番你部封晒塵嘅結他出黎重新學習！半途而廢嘅話做咩都唔會做得好架，而家科技咁發達，自學結他話都冇咁易啦，唔好嘥左網上資源同你嘅一顆充滿熱誠嘅心，而家就去學習啦！

【延伸閱讀】學普通話– 自學語文系列(1) -「千里之行，始於足下」
【延伸閱讀】自學日文– 自學語言系列(2)「持之以恆，『日』子有功」

此文章純屬 Blogger 個人分享，並不代表本網誌立場。