【行勻十八區・好玩好食大搜羅】- 北區篇

日日都去旺角、尖沙咀、銅鑼灣，人又多車又多，仲要黎黎去去都係果啲野，真係你唔悶我都悶啦！想同朋友仔，男/女朋友仔出去玩又想有啲新意，呢個系列一於帶你走入冷門啲嘅約會地點，重新探索香港。其實香港十八區，區區都有名物架！而家就即刻起身換衫，拎埋個袋，今日就同Tutor Circle尋補一齊走進北區睇下有咩玩啦！

1. 踩單車去食豆花放題

我要召集所有識踩單車嘅朋友！平時踩單車都係踩吐露港，今次黎搞搞新意思，入到上水踩單車兼食豆腐花放題！話就話係上水，但其實我地要去嘅地方係叫做河上鄉，離上水火車站有大約30分鐘嘅單車程。由上水站A1出口一出轉右，穿過左的士站，就會見到單車徑，跟住單車徑一路出發，過左隧道之後向後行，過馬路到對面，會見到一條河。沿住河畔一路，一路見到兩邊嘅農田，簡直好似去左另一個地方，好難相信同頭先塞滿晒水貨客嘅地方只係係附近。一直踩到見到一條橋，過橋轉左，向前踩多陣就到左河上鄉喇～裡面有兩間豆花放題，一間叫「豆美味豆花團」，另一間就叫「羅太豆花」，十幾蚊就有得任食豆腐花同埋任似豆漿，簡單而美味，可以比大家係度休息下再出發。
上水單車
（圖片來源自網上）

2. 大水管打卡

唔知大家有冇係IG見過好多人係大水管到打卡影相呢～呢幾條大水管正正就係頭先踩單車附近，可以順便去打卡tim啊！大水管負責輸送東江水黎香港，係香港係食水主要來源黎架！係頭先踩單車見到果座橋向右走，就會見到一座座嘅大水管喇。偽文青嘅各位又去打左卡未呢？唔識踩單車嘅朋友可以選擇搭車去，係上水站A4出口，係小巴站搭51K，到河上鄉遊樂場落車，再行15-20分鐘就到架喇～
上水單車
（Instagram截圖）

3. 鹿頸行山睇芒草

秋天又係睇芒草嘅好時節，但睇芒草唔一定要上大東山嘅，岩新手輕鬆啲嘅可以去鹿頸影芒草。係粉嶺站C出口出去，會見到一個小巴站，搵番架56K嘅小巴，大大塊牌會寫住「鹿頸」，搭到去總站落車～不過要留意番，呢架小巴係成30分鐘一班，一旦咁唔好彩走左架小巴就要等成半個鐘架喇！一落車就會見到一個好靚嘅湖，影完相可以繼續發掘下周圍有啲咩靚景，又有大草地，又有湖，又可以睇到沙頭角海，仲可以睇下見唔見到芒草tim啊！
上水單車
（圖片來源自網上）

4. 隱秘壁畫村

唔洗去韓國，唔洗去台灣，係香港都有壁畫村！呢條壁畫村坐落係打鼓嶺，姐係平時天氣報告話全港最凍果度啊。一樣都係係粉嶺站C出口果個小巴站，搭52K往坪輋嘅小巴，係九記士多落車，轉入小路行5分鐘到就見到壁畫村嘅入口喇！呢件事係由坪洋新村嘅居民發起嘅，想要美化村莊，於是邀請左世界各地嘅義工係村入面嘅小屋、牆壁同小徑上面畫畫，搖身一變成為七彩繽紛嘅壁畫村。
上水單車
（圖片來源自網上）

5. 三級歷史建築：粉嶺聖若瑟堂

想睇歷史文物，回味下以前嘅建築，唔一定下下要出到去港島嘅，係粉嶺聯和墟就有一棟碩果僅存嘅三級歷史建築——粉嶺聖若瑟堂，係一座依然開放緊比天主教教徒使用嘅教堂，已經建成左65年喇。雖然唔係好係好大嘅教堂，但果種寧靜安詳嘅感覺一啲都唔比大教堂差，聖嚴端莊，新人都可以選擇係度行禮架。搭火車去到粉嶺站，步行大約10-15分鐘就到架喇～
上水單車
（圖片來源自網上）

6. 聯和墟舊街市

唔知大家有冇睇過《每當變幻時》呢？係由楊千嬅同埋陳奕迅主演嘅電影，阿妙同魚佬係聯和墟街市賣魚從而擦出愛火花。呢套電影正正就係聯和墟舊街市拍攝，聯和市場早係2002年已經停止運作，仲係前排落定左活化工程，變為「城鄉生活館」，場內設置檔口售賣本地蔬菜、農產品同日用品，假日會有室外市集。聯和墟市更被香港獨一無二嘅建築tim！
上水單車
（圖片來源自網上）

假日想抖下，唔一定要離開香港出走出旅行嘅。香港你都未去晒，或者你有機會搵到屬於自己嘅一片小天地呢！
今次同大家去左北區先！下次我地第二個區再見～

【延伸閱讀】香港本地遊 | 發掘一個不一樣的香港
【延伸閱讀】香港展覽2018 – 書展、動漫節後值得一去的活動

此文章純屬 Blogger 個人分享，並不代表本網誌立場。