【中學補習】香港補習老師 - 我們都需要補習嗎？

【中學補習】香港補習老師 – 我們都需要補習嗎？

Post author:banana bro
Post category:小編分享
Post published:2019-01-11
Post last modified:2023-08-02

準備踏入DSE既第十二個年頭，熾熱既補習風氣似乎已經成為左常態，大家已經習慣左係璀燦耀目既霓虹燈、巴士車身、地鐵站內既廣告中見到名師處處留影，彷彿已經成為左生活既一部份，補習已經由以前既奢侈品變成左今日既必需品，呢篇文並唔係抨擊呢種風氣，或姐係評價個別香港補習老師，而係想對補習呢樣野略陳己見。Tutor Circle尋補談補習！

1. 小編個人經歷

小編係考2016DSE既，係升中四既時候，見到成班同學日日係到討論補邊個邊個，加上密集式既資訊轟炸，巴士、地鐵、Facebook、IG，結果忍唔住好奇心既驅使，再加上好驚比其他補完既同學成績大幅拋離，你知啦班名師個個都「領先全港」，十五、六歲既我好難唔比人拋窒。結果加入左大型補習社門外水蛇春咁長既人龍，每次上堂上live既時候，都以為去左演唱會咁熱鬧，加上大家手中都拎著筆記，封面係一張名師既型仔相，而家睇返轉頭真係以為成班係到追緊星。

2. 昂然回首

睇返轉頭，其實唔補又唔會特別落後。想當初為左食晒補習名師既notes，每日都花大量心機去鑽研同做練習，不如自己鑽研試題、做past paper對答案，分別真係差唔多，個schedule仲鬆動左，搭程車一來一回點埋名都冇左成個鐘。自學反而會因為自己解決問題而有更多既滿足感推動你去學習，甚至會想了解更多科目以外既野，同時亦都因為自學既能力得到認可，而越黎越有信心，越有學習既動力。但係點解咁多學生仲會去搵香港補習老師呢？

3. 學校老師唔掂

好多人都會話自己學校個老師好唔掂，跟唔上考評局最新指引、教得太慢／快／hea、冇skills教到同學等，咁自學同自己搵資源呢？基本上所有skills、需要既重點你都可以係網上或者書本、操past paper上學到，或者去補習社就會有大量模擬試題同練習試題提供俾學生。

4. 唔想煩呀

補習就係因為唔想諗，唔想煩，有班名師幫你諗掂晒啲野，要做咩、要讀咩、幾時做，所有野名師幫你安排好晒，佢話有幾多個side course咪報囉，人地塞咩比你就要咩。結果凡事都唔想思考，慢慢失去左獨立思考既能力。常言通識學critical thinking（批判性思考），但通識竟然都變左補習既大熱科目，究竟我地係被灌輸去學批判性思考，定係真係批判性思考緊呢？

5. 我冇時間啦

有啲人話名師可以幫手整理晒啲野，咁我咪可以慳啲時間速食，速食即囫圇吞棗，隔硬將啲一知半解既野塞入口，消化唔切，最後對學既野一知半解，不求甚解，好大機會係考試用唔返，甚至會係成個過程中冇任何得著。最重要既係失去左靠自己既problem-solving skills，一直依賴其他人，慢慢變成溫室小花。

總結

相信大家都明白教育唔單止係學習知識，好多讀書以外既野都值得我地去學習，而過份依賴補習就會反映左學生缺乏獨立自主既能力。相信自己，靠自己贏大學學位返黎，成功感一定會更大。

如果大家有通識補習的需要，不妨考慮搵Tutor Circle尋補幫幫手，經驗豐富，信譽良好，免費服務配對，為學生提供最優質的私人通識補習導師。

此文章純屬 Blogger 個人分享，並不代表本網誌立場。

延伸閱讀：

免費補習介紹 – 唔通個個都免費？（後附選擇中介tips）
補習網 – 搵私補？香港補習中介列表