【補習有冇用】英文底好反而冇着數？點學Exam Skills？

Post author:城大小薯仔
Post category:學術資訊
Post published:2019-01-25
Post last modified:2022-04-13

補習有冇用？英文唔係大部分香港人嘅母語，所以學起上嚟有困難都係無可避免，學到英文好似鬼佬噉就當然無得彈，但作為準備考DSE嘅你，究竟英文可以點補、點搞、點揀私補老師先係最有效嘅急救呢？Tutor Circle 尋補今日就同大家睇下英文科補習嘅一啲小貼士，希望幫助到有意改善英文能力嘅各位。

1.「鬼佬」導師未必好過本地人？

正常人嘅心理應該會覺得：人地母語係英文，佢哋教就一定無死啦！但諗深一層先，外籍老師正正就係因為母語係英文，好難去明白香港人學英文會有咩困難！

甚至好多母語係英文嘅人，對於DSE好着重嘅grammar同埋academic啲字，認識未必係咁深，即係香港人講廣東話，有時都唔知某啲詞係點解或者點寫。加上大部分嘅在港外國人都未必有考過DSE，唔清楚DSE對於學生嘅英文有咩要求，變相可能無咩機會學識／練習英文考試所需嘅技巧！

不過你如果係想學習accent，或者一啲不論係日常生活定考試都適用嘅說話技巧，咁母語係英文嘅人就一定幫到你，到時就唔洗成日淨係識講 I totally agree with you 啦。

英文補習 - 英文補習老師 — 外籍導師對於本地學生嘅認識較淺，未必了解學生學習嘅難處。

2. 補考試技巧定補英文？

其實在於考DSE嚟講，小編真心認為技巧大於英文。當然唔會話你英文好對考DSE都無用，但對於英文稍為弱嘅學生而言，技巧就係幫大家攞分嘅工具！

例如係Reading，如果識得睇段落嘅頭尾get段落大意，其實中間未必每隻字你都要明，或者考Listening，識得一早將幾頁嘅資料分翻開係邊題啱用，就可以節省好多時間。所以不論你英文係好定差，補習嘅時候不妨花多小小時間學翻／練習下呢啲技巧，咁考起上嚟都輕鬆啲啦。

英文補習 - Skills — 雖然話英文嘅基本功好重要，但要係DSE英文科考得好就可能需要一啲skills。

3. 狂操卷是常識？

小編係絕對唔否認操卷可以幫助成績增長，但本人都幾相信操卷係幫你熟習咗個考試模式，而唔係大力幫你提升咗英文能力。如果補英文唔單止係為咗應考DSE，而真係想英文進步，不妨補習個過程試下同導師用英文對話，令聽、講都可以進步，或者同導師講下，希望佢提供多啲DSE以外嘅文章，例如係報紙雜誌，甚至推介啲好睇，內容又岩你程度嘅英美節目／演講，好似TED，係上堂個時分析啲字可以點解、句子可以點寫等，噉就可以開開心心學好英文，又可以考好DSE。