餵人奶

【餵人奶】上唔到奶要補奶粉?媽媽分享親身經歷及注意事項

  • Post author:
  • Post category:親子專欄
  • Post published:2022-02-10
  • Post last modified:2022-02-10

(以下只係我既經驗/經歷之談,因為每個媽媽既體質同情況都唔同,但我都想分享出來比大家作個參考的😉)
新年快樂🧧 虎年祝大家好似老虎咁生猛🐯 最緊要身體健康💪🏻 入正題先…
我係陀緊個陣已經決定會做全人奶媽(我既意思係指埋身餵),所以未生之前都有搵好多餵人奶既資料,亦有問定其他媽媽餵人奶既tips。到之後因為我順產唔到要開刀 (食左全餐陰公),生完隔左3/4個鐘先抱到卡樂b,加上佢一開始無咩意慾食奶,姑娘都教過我用手揸奶的,但我揸極都揸唔到,所以係醫院個幾日都上唔到奶,要補奶粉🤦🏻‍♀️。
到出院返到屋企,我見卡樂b好似食極都食唔到咁,咁岩我有部泵奶機,諗住泵下睇下自己有無奶,一泵先開始有幾滴,但因為卡樂b食唔飽既關係,我都係keep住補奶粉比佢的。
餵人奶
因為身邊既長輩/朋友都好緊張我地,比左好多tips我,例如有人同我講 “餵人奶唔好餵太耐,每邊10分鐘就好,太耐會傷乳腺!”,我一聽到話會傷乳腺,又聽過乳腺炎係好痛,我double check都無,就直接跟住做。其實我頭3/4個星期都會谷奶,有時谷到會滴奶添,但因為我以為餵得耐會傷乳腺,所以我真係比卡樂b食10分鐘就夾硬掹返出來,之後見佢喊就再補奶粉。但係呢刻我仲未發現個問題,我只係好奇點解咁耐仲未上奶,卡樂b點解仲未可以齋食人奶飽,所以去健康院個陣我有問過人奶姑娘,姑娘估可能係我餵奶姿勢有問題,佢即場教我一個正確姿勢,叫我返屋企跟住做。
之後第5/6個星期,我都有跟住人奶姑娘咁教去餵奶的,亦都有上網睇下片去學,但卡樂b都係食唔飽,我都係要補奶粉。到第7個星期,我忽發其想,不如睇下健康院d小冊子囉!其中一本專係講母乳的,我一睇,先發現原來我之前一直做錯左,之前我可能係好多奶,分分鐘我繼續餵,係可以做到全人奶,但就因為我自己既疏忽,搞到miss左個上奶黃金期😫
餵人奶餵人奶餵人奶
到我發現左個問題之後,奶量最多個陣都只係去到90ml,之後我點追奶,都追唔到卡樂b既食量,而補奶粉既份量都愈來愈多 (因為佢都幾大食🙈),最後因為卡樂b覺得啜極都無奶出又唔飽,慢慢抗拒唔肯食人奶,所以我既奶量都開始下跌。
係呢件事上面我只可以怪自己,怪就怪在我無做資料蒐集,亦都無即時問專業人士,而我都因為呢件事,搞到心入面有條刺🥲不過點都好,其實無論食人奶定奶粉,bb都係咁長大,都係健健康康肥肥白白,所以都無咩所謂既~
最後我想對各位想做全人奶既準媽媽講,一有唔明/困難就要即刻搵專業人士,雖然可能身邊會有好多有經驗既朋友/長輩,但始終每個人情況都唔同,有經驗既朋友/長輩個一套方法都未必會適合你,所以點都係搵專業人士穩陣。
另外,我知道健康院每次都會派小冊子比各位新手父母的,我估10個有9個拎完都唔會睇😂但我個case就活生生咁證明左,其實本小冊子係有用的,所以我真係建議大家拎左之後盡快睇,唔好好似我咁突然醒起先睇,到時錯過左d機會就後悔莫及😔
 
延伸閱讀:
【BB外出用餐攻略】YO! 帶BB出街食飯咋嘛!洗乜驚呀?媽媽6大必備物品!
【加固食譜】6款簡易食譜推介 BB食得健康又有營養!
【BLW】BB加固期幾時開始?有咩食物可以餵?



--------------------
👼🏻現正招募「親子Blogger」!你都想分享育兒資訊?
立即將1️⃣筆名、2️⃣FB/IG/Blog page及3️⃣個人簡介 send俾我哋!
按此👉🏻Email
按此👉🏻Whatsapp
記得註明【申請做親子Blogger】,可能下一篇就係你嘅文章啦!😍
--------------------

留言