以前成日聽人講，生仔個轉變係好大(無論係生理啦，環境啦，甚至人生都係180度既大轉變🥶)。身型既變化就最明顯，因為陀緊個陣個肚會不停大，生完之後個肚就鬆曬。之後亦都有聽過會產後脫髮啦，另外唔夠訓呀、攰呀、無時間呢d就唔洗講都知架啦😌但有一d野，係要經歷過生仔先會知…

1. 體質

首先以我為例，我既體質由生之前既好怕凍好虛，變到生完之後成日覺得好熱會出汗🥵我係誇張到，街上面d人都著曬羽絨，陳生都覺得凍既時候，我都仲係著件薄長袖+薄外套但都仲會係出緊汗…個變化係明顯到連我d fd都驚訝原來生仔係會咁大轉變！

2. 視力

之後神奇既係近視變淺左😳話說我陀緊個陣想去配colour con，但個視光師話生完仔之後近視既深度有機會會改變，所以叫我唔好配con住。其實當時既我係半信半疑，但視光師佢係專業既，所以我都照聽。到生完之後我要買con，一驗先知我由500度近視減到去450度😨原來生仔係會令到近視改變架，唔親身試過都真係唔信！

3. 腳型

另外既轉變係腳型會大(我聽其他媽媽講🤣)，雖然我無特別大好多，但有其他媽媽分享比我聽，陀緊個陣隻腳大1,2個碼，諗住生完會變返以前咁，但點知生完都係無變🙈搞到以前所有鞋都著唔返，要買過曬😩。

4. 髮量

最後就係脫完髮之後會重新生過一批頭髮😯係我生完3個月之後，我去染頭髮，髮型師同我講係脫完髮無耐之後就會再生頭髮既，因為本身我係髮量好多既人來，所以係脫緊髮個陣個髮量都唔算有好大分別，所以我無咩為意…直到大約生完半年個陣？有日我紮辮，當我束起曬所有頭髮個陣，我發現係髮線個度有好多bb毛生左出來，因為岩岩生出來，所以d bb毛係企係度，驟眼睇個頭好似炸起左咁🦹🏻‍♀️，呢刻我先知原來係會生返咁~多頭髮。

以上就係唔講都唔知既生仔前後既變化，作為媽媽既你又有無共鳴呢？😂
今次就去到呢度先啦~
另外亦都十級強建議大家去埋我其他既social media度睇下啦，會睇到我地同bb互動既小片段的🤪

Frida Lee

一個90後/鐘意拍片/貪靚既新手媽媽。歡迎係IG • FB • YouTube搵我啦~

留言