【補習Secret】補咗呢2個女仔之後，我對私補產生咗陰影

Post author:尋補Blog讀者
Post category:讀者投稿
Post published:2019-03-27
Post last modified:2019-03-27

【補習Secret】上個月係Tutor Circle接左單補習，係小組補習黎既，兩個中六女仔補數。第一堂都好地地既，兩個睇落都frd底，又攬頭攬頸、拖手去廁所、有講有笑咁，加上我自問補得幾好，佢地望落好似都會繼續補。個刻我心諗：正，終於有單高質case，加上本人長期單身已久，係大學識唔到女仔，兩個女仔又cute cute地，青春貌美，自問係雖然Engine仔，樣貌都算中上，補多幾堂話唔埋仲有出pool添呀！

點知去到第二堂，兩個人分開黎到，咁無野既，有時大家時間唔啱姐，好平常。跟住開始補，一個坐我左邊一個坐我右邊，兩個完全冇交流。開始覺得有啲唔對路，唔通佢地對我有野？話晒我都係一個正人君子，要有返啲師德，你地唔可以咁樣㗎下。尷尬既我隨即起身話：「你地坐返埋一齊啦，我坐對面好教啲」佢兩個冇比反應我，繼續坐係到隔住個空位，眼尾都唔稍對一眼，我就坐左去對面。Okay，呀sir既說話都唔聽，冇所謂，你地鍾意點就點。

依個時候，明眼人都睇得出佢兩個一定有啲野，但係大鑊既野就發生啦。教到咁上下，我派左份past paper比佢地做，計返15分鍾要佢地完成啲題目。做左5分鐘之後，A細細聲叫我：「呀sir，第三條我唔係好識。」B用輕佻既眼神望佢一眼，陰聲細氣奸笑咁講左句：「咁易都唔識，考咩DSE呀。」

雖然Math Part 1A既題目係易，但都唔洗咁講野既，大家同學仔應該和睦相處先至係㗎嘛。個一刻氣氛相當尷尬，正當我諗住做和事佬緩和下氣氛既時候，A已經按捺不住，神情頓時非常惡死﹐彈左句粗口：「關你_事呀。」嘩，你兩個前幾日唔係仲攬頭攬頸㗎咩，做咩今日會變成咁既！！？？呢一刻既我只係諗住打圓場，希望停止呢一場有機會演變成第三次世界大戰既罵戰，比我安安樂樂補埋咪大家鬆人囉。

「好啦⋯⋯」我都未講完，B即刻還擊「同你啲垃圾補影響我進度呀」，雙方一路互啤一路用粗口鬧對方「咁你咪走囉_ _ 」、「_ 你 _ _ 」、「_ _ 」呢一刻我知道已經大勢已去，地球上已經冇野可以停止佢地互相辱罵，之後佢兩個鬧到走左，我係一旁完全係睇到呆左，細佬縱橫私補界咁多年都未遇過咁既情況，我真係唔明白點解上天要派左呢單case比我。
呢一件事入面最大既受害者其實係我。有邊個會估到，兩堂時間竟然換黎一個咁既結局，簡直比莎士比亞四大悲劇《哈姆雷特》《李爾王》《奧賽羅》《馬克白》更加令人心碎。呢一刻我剩係想知，我個兩堂錢有冇得claim返，彌補返小弟心靈上既創傷。
投稿讀者：匿名

你都有故事／溫書貼士／學校搞笑嘢想分享？💬 立即按圖投稿啦！