【香港社會問題】補完呢兩個學生後，我深深體會到香港貧富懸殊……

Post author:薰衣草貓貓
Post category:讀者投稿
Post published:2018-07-12
Post last modified:2018-07-12

香港貧富懸殊問題一向嚴重，但我一直都感受唔到究竟有幾大差距。補完呢兩個學生之後，完全係兩個唔同level既社會階層，令我深深體會到咩係「贏在起跑線」，而兩個小朋友既性格同學習態度都有好大分別，今次透過Tutor Circle尋補平台同大家分享。

兩個家庭

小編係兼職補習老師，上個月初接左兩單補習個案，都係教小四既語文科，導師費用相同，點知屋企環境就相差好遠：一個住青衣既私人屋苑，另一個就住係大窩口但連google map都無紀錄既唐樓，入到去原來係劏房，

1. 小康之家

首先講下住青衣私人屋苑果個「港孩」，佢媽媽第一堂就話我知：「係我果乖仔主動要求搵補習老師嫁，佢上次考試好差，如果唔係咁，我都無諗住搵人上門教佢嫁。」
當我聽完呢番說話，即刻覺得果小朋友應該係好學型同埋有進步既決心（內心十萬個興奮)。係我過往4年既補習經驗入面，大多數既小學生都係被父母迫住上堂，難得今次遇上一個自己想補習既男仔，點知事與願違……

貧富懸殊香港 - a boy playing with his iphone — 小朋友參加大量既興趣班，時間表一星期有7條柱。（示意圖）

一叫佢試下用詞語造句，即刻就話諗唔到、唔識寫、好難諗；嘗試引導佢去創作句子既內容，又嫌抄例句麻煩、問點解要讀句子；當我好有耐性咁解釋新詞語既意思，佢竟然不停咁玩擦膠、間尺，令我覺得自己好似同空氣講緊野，完全同我期望既上課情況差太遠。
上左一陣堂，佢就問:「幾時休息呀？放學未？我仲好忙嫁!」嘩！我果一刻勁無奈，心諗呢個男仔應該係比佢父母縱容到一d禮貌都無，從來唔識用「老師」呢個稱呼，而且唔鐘意補習。
我問佢：「你有咩咁忙呀？我都係百忙之中抽時間幫你補習咋。」
佢媽媽係一邊搶住答:「佢星期一至五放學就要參加出面既功課班，有時係學校上左羽毛球班先再去功課班，我都想儘快取消佢既活動，等佢放多d時間係學業上。另外，星期六早上要操卷、下午上中文班、晚上有英文班…」新一代既小朋友忙碌既程度簡直同大人有得揮。

貧富懸殊香港 - 劏房 — 劏房既居住環境惡劣，小朋友需要更加堅強先可以適應係呢個環境。（示意圖）

延伸閱讀：【DSE不幸事件】考試期間生水痘點算好？老師：唔考好過考！

2. 家境不佳

輪到講下住大窩口劏房既學生，「輸左起跑線」，第一堂果陣佢媽媽因爲要番工就唔係屋企，得呀姨係度，當課堂開始果陣，佢呀姨竟然話要出去，得番我同果學生。
於是我問個學生:「一陣落堂之後，得你自己一個係屋企，得唔得嫁？」個小朋友用好微弱既聲音話:「無問題，我成日都自己一個人留係屋企。」當時既光線好暗，我提議開番盞燈，點知佢話:「唔洗開燈啦，暗暗地我都睇得好清楚，唔好嘥電費。」呢個小朋友真係好生性，知道屋企經濟唔好同埋呀媽做野辛苦，所以想慳得就慳。
至於係上堂既過程中，佢都好聽話咁跟我指示去mark筆記，好認真同專心做練習，又應承我下堂之前會完成好我交低既功課。
雖然佢既英文程度真係好差，但我深信佢憑住謙虛勤奮既學習態度，佢既成績一定會有所進步。不過唔知係咪基於家庭背景關係，佢既自信心較少，性格內向，說話不多。落堂後我再係電話上同佢呀媽交代下上課既情況，佢媽媽感謝我同拜託我好好幫佢果仔打好英文基礎。