圖片來源  資料引用/摘錄：mind.org.hk 你哋身邊有冇朋友係焦慮症患者呢？同你地講個秘密，小編係一個焦慮症患者，我想寫呢篇文嘅原因，唔係因為博同情，消費自己嘅病，只係想分享吓自己嘅感受。我身邊有朋友，甚至屋企人，會係我唔開心嘅時候，同我講加油，一切都會好。老實講，對小編而言，呢啲經典勵志說話，同阿媽係女人嘅道理係冇分別。反而，呢啲説話會令我唔敢再咁搵朋友傾訴，只搵一啲明白我嘅人，例如社工。其實，而家焦慮症好普遍大家，首先大家唔好將呢件事睇到咁大，當囇所有焦慮症患者都係怪物。今日Tutor Circle小編教你五個方法，正確地與焦慮症患者交流。  

甚麽是焦慮症？

圖片來源  根據mind.org.hk所提供的資料,「焦慮症」是形容不安、擔心，和恐懼等情緒。它包含我們緊張擔心時的心理和生理症狀。雖然焦慮情緒會令我們感到不自在，但此情緒其實源自我們「戰鬥或逃跑」的心理防禦機制，是人類面對威脅時的正常生理反應。   ［延伸閲讀］【心理】點樣去解決壓力? ［延伸閲讀］【香港臨床心理學家揭秘】關於臨床心理學家的4個問題  ［延伸閲讀］【心理學出路】讀心理學就一定識讀心？唔通要做讀心神探？  ［延伸閲讀］【心理學101】控制命運的自證預言心理學  ［延伸閲讀］【未來出路】隨心 還是 計劃 ? – 對於未知，你恐懼嗎？ 

1. 唔好再責怪患者，多啲體諒佢哋

圖片來源  首先，焦慮病患者會經常受到情緒，同埋藥物嘅影響，令自己身體不適。小編都有試過食血清素，食完就會覺得好頭暈。有陣時自己嘅情緒亦都唔係好穩定，令身體俾警號我。例如胃痛、頭暈等等。有好多人都問我點解你又唔返學啊？咁鍾意喺考試之前唔返？其實，小編好想同佢哋講：「我都唔想」，冇人想自己有病，自己辛苦，但係當事情發生嘅時候，我哋始終需要時間去接受，需要休息。有陣時請假係因為身體已經負荷唔到，有時候，我哋出去見人都會覺得好恐懼，所以淨係想留係一個熟悉嘅地方，保護自己。如果你都係一個焦慮症患者，小編想同你講辛苦晒，可能冇人會明白你。每個人都會責怪你，但係你已經好叻，經歷咗好多嘢，真係辛苦晒喇！如果你身邊有焦慮症患者，不妨俾多啲關心佢，唔好再責怪佢哋，因為冇人想自己有病。  

2. 講加油、努力？不如俾患者一個擁抱！

圖片來源  第二，小編知道好多人可能都會覺得安慰焦慮症患者好難，都唔知講咩好。到頭來，為咗大家嘅對話唔好咁尷尬，就同對方講「你要加油」，「努力會令你變得更好」嘅說話。講真，小編十分明白，小編未經歷焦慮症之前，會覺得焦慮症就係比唔開心嚴重啲，講一句「加油」就可以令患者振作。後來，小編發現之前既諗法係大錯特錯，當朋友、家人同我講加油、努力，我會好質疑自己以前嘅自己係唔係唔夠努力，大家先會咁樣同我講。其實，我已經好努力，咁係唔係因為我蠢，所以大家覺得我唔夠努力。呢啲對話令我更加質疑自己，令到自己嘅內心更加難受。如果你身邊嘅朋友係焦慮症患者，當你唔識回應佢哋嘅苦況，不如擁抱佢哋，等佢哋感受到溫暖，相信一個擁抱係戰勝千言百語。  

3. 請減少使用Whatsapp Stickers，去回應患者嘅傷心

圖片來源  第三，吓！連Whatsapp Stickers都唔可以用，有冇咁專制啊！其實，小編都覺得Whatsapp Stickers好可愛。有時候都會用Whatsapp Stickers， 去同朋友對話，但係當身邊朋友嘅朋友覺得唔開心既時候，就盡量避免用Whatsapp Stickers去回應。試想想，如果你唔開心，send咗一段千字文俾我，到頭來我淨係send返個Whatsapp Stickers俾你，你都會覺得有冇搞錯啦！當然WhatsApp的佢可以當作輔助工具，你send完一大堆文字，再用Whatsapp Stickers點綴，係無任歡迎。不過，你可能同小編講，我唔識點樣安慰朋友，所以先用Whatsapp Stickers啫！唔緊要，小編而家就教你一個方法。當你諗唔到嘅時候，而且你又得閒，不妨同朋友講：「我哋不如去飲杯嘢，然後先慢慢傾。」一來朋友真係會感受到你係關心佢哋，二來你又可以有時間諗點樣安慰佢哋，一舉兩得。  

4. 唔好再用「唔！」、「哦！」，去回應患者

圖片來源  第四，有陣時小編好明白大家可能諗唔到點樣安為患者，所以就答「唔！」、「哦！」先，起碼有俾到回應，但係如果小編同你地講，假如你有一次考試考得好差，就同其他朋友傾訴，想得到安慰，但係最後朋友只係簡簡單單地同你講一句「唔！」、「哦！」，可能你都會覺得好唔開心，覺得個朋友喺度Hea你。你有呢個反應係一件好正常嘅事，每個人都想被認真對待，無人想俾人敷衍，當你尋找安慰，係低谷嘅時候，已經踏出左第一步，去同其他人傾訴，但最後俾人hurt。其實一啲都唔好受，無論你身邊有冇朋友係焦慮症患者，請唔好用「唔！」、「哦！」，去回應佢哋嘅悲傷，每一個人都值得被尊重。  

總結

總言來說，以上就係小編所介紹嘅五個方法，其實，焦慮症患者同其他人都係一樣，就好似患上傷風感冒咁樣，有感冒可以食藥治療，焦慮症都一樣可以，只不過比治療傷風感冒，花多少少時間。我哋覺得最唔舒服嘅係大家喺度討論自己嘅病情，喺度責怪你點解唔可以好似其他同學一樣正常上堂，要瞓係張枱度。小編可能今篇文寫得有少少負面，如果有任何冒犯，敬請原諒！不過，我希望呢篇文可以幫到大家，有陣時唔一定要用說話，先可以傳達心意。坐喺度聽吓我哋講嘢，已經覺得好滿足、好感恩。   此文章純屬 Blogger 個人分享，並不代表本網誌立場。 *本文根據了mind.org.hk既網頁。  

想追返學校進度？Tutor Circle尋補有超過10,000個三大導師，即日幫你搵一個合適既導師！

想搵 一個合適既私補老師

DSE讀得咁辛苦，想活用知識黎賺下外快？

想搵 好多好多私補學生

緊貼尋補 Blog、Facebook、Instagram同LinkedIn，尋補？Tutor Circle！

Z世代 修辭手法 Ocamp 英文補習 上莊 中文補習 議論文 slp sample 補習網 數學補習 大學五件事 綜合格式

*此文章由 Blogger個人／編輯團隊 分享並僅供參考，意見及內容並不代表本網誌立場，Tutor Circle 尋補 對信息或內容所招至的損失或損害，不會承擔任何責任。

尋補？Tutor Circle！

其他人還看了……

中學排名  呈分試  升中面試  英文補習
大學收分  Jupas  副學士  DSE筆記
大學五件事  私補價錢  Ocamp  暑期工
生日好去處  IQ題  任坐Cafe

留言