【瞓唔着】失眠點算好？10個簡單有效失眠解決方法

失眠，並唔等如瞓唔着，間唔中一兩晚瞓唔到唔算係失眠㗎，係正常現象嚟。好難瞓得着，或者就算瞓咗都瞓唔到耐，而且呢個情況持續幾日至一個禮拜，先可以稱之為失眠。日日都係咁樣失眠嘅話，會令到日頭冇精神，而且脾氣都會好差，同埋導致集中力不足。長期失眠仲會引致其他健康問題，例如精神問題、睡眠障礙等，所以有失眠問題嘅朋友一定要病向淺中醫，以下Tutor Circle 尋補就睇下呢幾個方法可唔可以幫到訓唔著嘅你啦！

延伸閱讀：【失眠穴位】按摩4個穴位助你輕鬆解決失眠問題

1. 飲蜂蜜牛奶

飲熱牛奶可以幫助睡眠我諗係人都知，但要將熱牛奶嘅作用發揮到淋漓盡致，效果更上一層樓，秘訣就再於加入蜂蜜。要知道點解蜂蜜牛奶有用，首先我地要認識「色胺酸」呢種物質，佢又被稱為天然嘅助眠劑，可以安定神經同埋舒緩各種緊張嘅情緒，而我地正正就可以喺牛奶裏面攝取色胺酸，而蜂蜜嘅效用就係佢嘅糖分可以幫助色胺酸快啲進入腦部，從而釋放睡意。

2. 食香蕉

唔知大家有冇聽過食蕉會令人開心呢？因為香蕉入面有另一種氨基酸，叫做γ-氨基丁酸（簡稱GABA），可以抑制中樞神經嘅過度興奮，促進放鬆，幫助你進入睡眠狀態。而且香蕉有豐富嘅澱粉質同纖維，飽腹嘅感覺亦都會令人產生睡意。

3. 聽自然音樂

臨瞓前聽住啲音樂入睡係唔錯嘅方法，因為音樂亦都有放鬆神經，舒緩情緒嘅效用，但有時聽到自己中意嘅歌，又會忍唔住跟音樂搖擺，唔中意嘅歌又唔想聽。解決方法嚟喇，就係聽自然音樂，即係一啲自然嘅聲音，例如係雨水聲、海浪聲、叢林入面嘅雀鳥聲。跟番個人喜好揀中意嘅聲音，聽啲悅耳嘅聲音，融入大自然，都會好瞓啲㗎！

4. 睡前熱水泡腳

瞓教前可以用熱水浸腳浸10-15分鐘，或者沖番個熱水涼，改善血液循環，可以容易啲入睡。呢個方法允其適用於手腳長期冰涼，夏天對腳都係凍冰冰嘅女仔，人皮膚嘅溫度上升暖笠笠個人都會好瞓啲，冇咁易醒。

5. 腹式呼吸法

如果有玩開瑜珈嘅朋友相信對腹式呼吸法都唔會陌生，腹式呼吸法對改善睡眠最大嘅用處都係放鬆緊張心情。正確嘅腹式呼吸法係係吸氣嘅時候橫隔膜下降，使你嘅肚皮膨脹；呼氣嘅時候相反，咁樣會幫身體吸入多啲氧氣，排出二氧化碳。腹式呼吸法再配合埋4-7-8嘅節奏，即深呼吸4秒，跟住閉氣7秒，再慢慢呼氣8秒，據聞60秒內就瞓得著！平時做下運動，夜晚都會好瞓啲㗎！

瞓唔着 - 腹式呼吸法 — 腹式呼吸法令人嘅集中力放係呼吸上面，慢慢進入放空狀態。

6. 遠離電子產品

呢個係好多都市人嘅通病，平時生活咁忙碌，臨瞓前可以碌下手機已經係最大嘅娛樂。但臨瞓前不斷睇住手機、平板等呢啲電子產品，佢地嘅藍光會刺激腦部，令你嘅腦部持續一段時間處於興奮狀態。所以有專家建議臨瞓前嘅一個鐘頭都唔好接觸電子產品，令腦部冷靜落嚟。各位失緊眠瞓唔著都好，千祈唔好嫌悶走去撳電話，只要令你愈嚟愈冇睡意。