【緊急入台證】落地先發現冇搞台灣簽證唔通要原機折返？

Post author:媽劇停
Post category:小編分享
Post published:2018-12-13
Post last modified:2018-12-13

除左日本之外，相信好多香港人嘅另一個家鄉必定係台灣，另外有唔少旅遊初哥都會選擇台灣作為第一次去旅行嘅地點。點解？原因有二：第一，平；第二，近！香港人工作忙碌，唔係下下都拎到幾日假去個優哉悠哉嘅旅行，台灣夠近又夠平，最岩香港人突然興起想出走黎個快閃。興高采烈咁上機結果臨落機一刻先發現自己忘記左搞入台證？！唔通要我係機場即刻買機票走？！唔怕！等Tutor Circle 尋補話你知申請入台證嘅3個方法。
由2017年7月1號起，香港人有以下3種方法可以揀黎申請入台證：
1. 雲端線上申請 (非香港出生首次申請者／係台灣停留超過三十日)
2. 網路簽證（係台灣停留唔超過三十日）
3. 落地簽證（係台灣停留唔超過三十日）

有充足時間準備入台證？

想係網上自辦入台證

1. 雲端線上申請

如果你係首次入台而又唔係香港出世；又或者係想留係台灣超過一個月嘅話，符合以上任何一樣條件的話，就要用雲端線上申請。而費用就隨住逗留時間增長同埋一次定多次出入境台灣而增加：
・單次入出境證：TWD600
・一年多次入出境證：TWD1000
・三年多次入出境證：TWD2000
所需文件：身份證、香港護照（有效期六個月以上）、工作證明或在學證明、
最近兩年內影嘅兩吋半身彩色白底照片(4×6)及其他相關證明文件。
上載好以上所講嘅文件再填埋份線上申請書就得啦～記住中文一定要用正體字。

台灣落地簽證 - 雲端 — 首次申請入台證而且係非香港出生居民，或者係要係逗留係台灣超過30日嘅話可以使用雲端線上系統申請台灣簽證。

2. 網上簽證

如果你係香港出世嘅香港永久性居民，又或者即使你唔係香港出世，但曾經去過（即刻搞過一次上面方法1），咁就恭喜晒你喇！入台證嘅辦理手續簡單方便快捷，而且仲係費用全免架tim！大家只要去「內政部移民署」嘅網頁照返護照填寫簡單資料，然後就會即時審批，跟住自己搵部printer打印返張網上簽證出黎，帶齊護照同機票，就可以出發架喇！24小時都得架！超方便!

台灣落地簽證 - 網上 — 網上簽證嘅手續最簡單，而且係24小時可供申請，費用全免。

3. 落地簽證

假若你到埗之後先發現自己唔記得左搞入台證，或者發生任何意料之外嘅事，總之就係冇入台證係手啦，落地簽證係你最後一條救命稻草。只要你符合普通網上簽證嘅資格，就可以選擇落地簽證。而費用就要比TWD300嘅，如果咁不幸嘅話（雖然係人為），就當買個教訓啦。
所需文件：香港護照（有效期3個月以上）、出入境申請書（到時有得拎）、30日內已完成訂購嘅機票/機票證明、舊入台證（非港澳出世而又曾經入境台灣嘅朋友先要）

台灣落地簽證 - 內政部移民署 — 符合資格嘅朋友可以係台灣各主要機場港口向「內政部移民署」服務單位申請「臨時入境停留」。

總結

	準備文件	費用
雲端線上申請	身份證、香港護照（有效期六個月以上）、工作證明或在學證明、最近兩年內影嘅兩吋半身彩色白底照片(4×6)及其他相關證明文件	・單次入出境證：TWD600 ・一年多次入出境證：TWD1000 ・三年多次入出境證：TWD2000
網上簽證	香港護照（有效期三個月以上）及打印機	全免
落地簽證	香港護照（有效期3個月以上）、出入境申請書（到時有得拎）、30日內已完成訂購嘅機票/機票證明、舊入台證（非港澳出世而又曾經入境台灣嘅朋友先要）	TWD300