拍拖相處之道

【拍拖相處之道】有一種叫青蛙女友!情侶間是旅行青蛙關係?

  • Post author:
  • Post category:小編分享
  • Post published:2018-02-21
  • Post last modified:2018-02-21
studentconversion
tutor registration

說實在,我都唔知旅行青蛙有咩好玩。佢唔似Monster Hunter World咁刺激,又唔似LOL有得連機同朋友一齊玩。可能因為旅行青蛙遊戲簡單,亦冇勝負之分,每次只須幾分鐘,令佢有種莫名奇妙嘅黏力,意外地喺大陸、台灣同香港爆紅。等Tutor Circle尋補介紹呢個青蛙女友比你識啦。
 
旅行青蛙簡單啲嚟講,係一隻青蛙養成手機遊戲。有時青蛙會喺屋企睇書、食飯。
你唯一可以做到嘅,只係喺庭院收割三葉草賺取錢幣,
用嚟幫青蛙買旅行嘅餐點便當、護身符等工具。
青蛙鐘意幾時走就幾時走,幾時番就幾時番。
每次外出旅行,佢會寄明信片比你,話你知佢去左邊,番嚟又會帶手信比你。
有時候,佢啲朋友仔──蝸牛、蜜蜂同埋烏龜會失驚無神到訪你屋企。
你按照佢地嘅喜好比唔同嘅食物,佢地走嘅時候就會比唔同嘅回禮你。

拍拖相處之道
係咪似曾相識既畫面呢!

 
有啲人分析,旅行青蛙風靡一時,係因為玩家會不自覺感情投射落去。
有人話呢個現象反映都市人生活大壓力,好多人都好想好似青蛙咁,
想走就走,有多啲私人空間想做自己鐘意嘅事。
亦有啲人話玩家同青蛙嘅關係就好似呀媽同個仔咁,
想仔女喺出面闖下,但當仔女唔係屋企,又會記掛佢幾時番,
會擔心仔女咁耐冇番屋企會唔會係發生左啲咩意外等等。
不過除左親子關係,玩家同青蛙嘅關係某程度上都反映一啲情侶相處之道。
女人口是心非?見女朋友嘅好姊妹仲難過見家長?情侶究竟要保持幾遠嘅距離?
分手講到嘴邊最後又呑番入肚?究竟係咪有情侶相處之道呢回事?

 
《我的少女時代》有句好出名嘅對白:
「很久很久以後我們才知道,當一個女孩說她再也不理你,
不是真的討厭你,而是很在乎你,非常非常在乎你。」
對於呢對說話,女嘅就拍案叫絕,話有同感,男嘅卻百思不得其解。
女人口不對心,已經成為左公認嘅事實(好似係,除非唔係)。
女嘅覺得唔需要次次都畫公仔畫出腸,
想個男仔主動啲、細心啲諗下佢真正想要啲咩。
男嘅,心諗:有咩想講咪講囉,下下都估估下,咁樣好咩?
遊戲入面,你唔駛點同隻青蛙溝通,淨係擺食物落佢個袋,
得閒比下四葉草等佢平平安安,儲下錢買下道具比佢。
佢唔喺屋企,擺啲食物落枱面吸引佢多啲番嚟。
有時佢隔左幾日都未番屋企,你會開始擔心:
「死仔究竟你幾時先番?你係咪蕩失左路,定發生左啲咩意外?」
但無論佢走到幾遠,最後都會識得番嚟。
但男女朋友唔同,如果冇適當嘅溝通,雙方又唔肯表達真正嘅感受,
咁段關係都凍過水,到時後悔都冇用。
曾幾何時有朋友同我呻:「有晚,我同女朋友嘈交,佢叫我比佢冷靜下,
咁我咪唔出聲由得佢囉。點知佢仲嬲,問我點解唔氹番佢,佢都打橫嚟講嘅!」
拍拖相處之道
對住女朋友,會瞬間變成笨蛋

有人話,見女朋友嘅好姊妹仲難過見家長。
現實生活中,冇攻略話你知蝸牛、蜜蜂同埋烏龜鐘意啲咩。
就算唔睇攻略,遊戲入面,你都可以用佢地嘅回禮估計佢地鐘唔鐘意你比嗰樣食物。
但要應付姊妹團絕對係一件挑戰人體極限嘅事情。
就算你有十八般武藝, 外表扮到有幾成熟穩重、事業有成、
專一認真、細心體貼、幽默大方……(下刪一千字),
好姊妹講你一句衰嘢,分分鐘你講十句都補唔番。
你唔止要好似養青蛙咁得閒無事比啲食物佢地食,
仲要喺佢地面前有個好嘅形象,
例如當佢地講緊其他女人壞話嘅時候,記住要同佢地理性分析
試下講:「係囉!我都覺得邊個邊個唔岩。」咁就包保你出入平安。
拍拖相處之道
「佢班姊妹,次次我地嘈交淨係識得勸佢分手。
每次我用盡九牛二虎之力氹番佢,幾經辛苦終於和好番。
佢一同班姊妹訴完苦,又嬲番我。」
喺呢個時候,我只能夠勸勉一句,你搞唔掂啲姊妹,以後日子都幾難過。
拍拖相處之道
情侶相處最難拿捏,莫過於究竟要保持幾遠嘅距離。
初初拍拖,糖痴豆咁嘅款,每次講byebye都搞到難離難捨咁,講左十萬次早抖都仲未肯瞓。
但日子耐左,漸漸發現距離太近會容易產生磨擦,冇左份新鮮感,但太遠又會影響關係。
要有私人空間得嚟又要有足夠嘅二人世界,不如一槍打死我算。
屠龍嘅時候緊係想女朋友唔好阻住哂。
而你都會想佢有自己嘅生活圈子,得閒約下朋友食下飯,唔好生活淨係得你,
但當佢一日、五日、甚至十日唔搵你嘅時候,又會心掛掛。
就正如養隻青蛙,初時好想佢快啲離開屋企去旅行,
但發現佢兩三日都仲未番屋企嘅時候,就會心急,
無時無刻都check住佢番左屋企未。
學《瑪嘉烈與大衛系列-綠豆》入面話齋:
「人與人之間最適當的距離,就是適可而止,
就得越近,感覺會越遠。
無論你有多愛那個人,也不可以太親近,
在天長地久之前,我們要學會如何分開。」
拍拖相處之道
講到尾,就算明知兩個人相處會踩倒幾多地雷都好,
你仍然會「明知山有虎,偏向虎山行」。
你明知隻Game無聊,你仍然會心掛掛隻青蛙番左屋企未。
冇男女朋友嘅,雖然身邊啲朋友成日喊苦喊忽咁話唔再相信愛情,
但有時候都會FF下自己何時葡萄先熟透。
有人話愛情有保鮮期,當過左最佳品嚐期限,就冇左當初嗰份怦然嘅心動。
有人話,十對情侶有九對都捱唔過畢業嗰關,
特別係大學畢業出嚟做嘢之後,大家各有各有忙,有時連見一面都難。
又或者係踏入社會,視野闊左,性格又會獨立左,
需要嘅未必再係一個日日痴住,學業會carry你,有咩唔識可以問佢嘅人,
而係一個成熟上進,會一齊計劃將來嘅人。
拍拖相處之道
你覺得旅行青蛙悶,或者唔鐘意隻青蛙,你可以㩒幾粒制就刪走隻Game,
好快你就可以搵過另一隻Game取代。
無錯,你都可以話分左手都可以好快搵倒下一個,
但分手所帶來嘅傷痕,會喺你心入面揮之不去,間唔中仲會隱隱作痛。
相處有爭拗,係無可避免。
但個距離,係咪真係大到唔能夠繼續行落去?
「明明你以前唔係咁嫁….. 你對我已經唔係好似以前咁……」
關係出現問題,雙方都有責任共同解決。
當一方主動表達自己喲感受,例如覺得你啲異性朋友仲重要過佢、覺得你根本唔重視佢嘅時候,
問你/佢一句:願唔願意改?唔願意嘅話,分手啦。
要出pool其實真係唔難,但要right person, right timing, 先係最難。
喺香港嚟講,七百萬人口入面認識已經唔簡單,
仲要你鐘意我又鐘意我,仲要雙方都ready好,直頭難過登天。
呢句嘢雖然好老套,sad but true。
唔通,你真係想用一句:「我冇嬲呀!」作為迴避處理關係破口嘅藉口?
 
投稿讀者:Waiting


你都有故事/溫書貼士/學校搞笑嘢想分享?💬  立即按圖投稿啦!
讀者投稿

延伸閱讀:
【暗戀故事】 聽到的是望伊的聲音和你的故事
【短文寫作】初見-初戀-失敗-分手,但畢生難忘的第一次戀愛
【愛情經歷】酸甜苦辣鹹 五味皆全
【情侶相處之道】有一種女友叫青蛙女友



*此文章由 Blogger個人/編輯團隊 分享並僅供參考,意見及內容並不代表本網誌立場,Tutor Circle 尋補 對信息或內容所招至的損失或損害,不會承擔任何責任。


尋補?Tutor Circle!


Copyright © 2023 Tutor Circle 尋補. All rights reserved. 此文章未經許可,不得轉載。
Copyright © 2023 Tutor Circle 尋補. All rights reserved. 此文章未經許可,不得轉載。

其他人還看了……

中學排名  呈分試  升中面試  英文補習
大學收分  Jupas  副學士  DSE筆記
大學五件事  私補價錢  Ocamp  暑期工
生日好去處  IQ題  任坐Cafe

留言