【面試技巧】自我介紹：工作篇

Post author:kindofleisure
Post category:小編分享
Post published:2018-04-11
Post last modified:2023-06-30

又到咗大學生搵工嘅季節，每年去到呢個時候大家都會好擔心，Send咗幾百封CV出去又無回音，有回音嘅時候又擔心面試嘅表現。其實如果去到面試階段嘅話已經有5、6成機會入到架喇！你諗下，HR肯曬時間見你，仲唔係有機會入到？Tutor Circle尋補教你面試時候如何做好自己。大家都要注意一下自己嘅面試表現，唔係好易「臨尾香」！所以今次尋補就為大家講下面試技巧，特別係自我介紹。

1. 控制時間

自我介紹切忌過長，好多人以為自我介紹有幾多講幾多，諗到就講晒佢。其實係唔啱架！首先，太多嘅資訊會令到HR覺得好悶同冗長，試諗下，個HR可能已經聽咗好多似呢啲嘢，再講咁長只會令佢覺得悶同煩。另外，講太長好易會出錯，姐係講多錯多，如果有啲嘢係作出嚟嘅就儘量唔好講太多，一陣比人問到口啞啞就麻煩喇！講得太少又唔好喎，原因好簡單，因為佢會覺得你嘅能力同知識有限，睇唔到你有咩潛在價值。所以，小編認為最適合嘅自我介紹長度係大約一分鐘左右，一分鐘唔長又唔短，可以好快簡介一下自己嘅能力又唔會悶親HR。
時間管理真係好緊要架！平日點分配時間你識唔識呢？

時間管理4大秘訣

2. 50%自己 VS 50%Career Path

好多人係自我介紹嘅時候會淨係講自己啲嘢，講完名講性格，講完又講興趣。小編唔係想話講自己唔好，講自己嘢可以令到HR更加了解你，不過佢可能會覺得你無考慮過你對公司嘅益處！所以，係自我介紹嘅時候千其唔好齋講自己呀。小編嘅建議係一半講自己，一半講你嘅Career Path講自己可以講啲特別啲嘅體驗同得著，好似Exchange呀，Intern呀，甚至係一啲特別嘅技能好似語言呀Coding等等。而Career Path可以講下自己對果行嘅認識，對果行嘅了解同興趣，可以嘅話都盡量連番住你In緊果間公司，咁嘅話，你就可以係講到自己有啲咩Value可以比到公司，大大增加你嘅入職機會。

3. Soft Skills

Soft Skills 呢個因素可以話係非常關鍵，亦都係最難學嘅一種。所謂Soft Skills，姐係一啲對工作無直接用處但係有間接幫助嘅嘢。簡單嚟講，自信心係非常決定性嘅因素。係自我介紹嘅時候，一定要表達到自己嘅信心，最簡單嘅就係講嘢嘅時候望住人同坐直。再高層次啲嘅就係係自我介紹嘅時條靈活運用手勢，咁樣做嘅話，HR就會覺得你嘅工作經驗唔錯，面對大場面都臨危不亂，自自然然佢就相信你嘅能力，大大增加你嘅入職機會！！