【補習阿sir】男私補老師係原罪？無辜被學生阿爸爆門大喝

Post author:尋補Blog讀者
Post category:讀者投稿
Post published:2022-05-10
Post last modified:2022-05-10

講起Secret大家都會諗起名校Secret、各大專院校Secret等，而Tutor Circle尋補作為私補配對平台，都有唔少關於私人補習既趣事趣聞同大家分享，尤其係唔少學生家長導師都會同我地反映私補鮮為人知嘅秘密，就喺到同大家分享下呢位補習阿sir的故事啦！

補習界風氣：重女輕男

私補呢行不嬲重女輕男就係人都知架啦，個個都話要搵女導師，女學生又話要安全啲，男學生又話想親切啲。我地依啲私補阿Sir去到邊都冇人吼，算吧啦，咪又係要做，所以我已經慣性會apply晒所有cases，不論佢係搵女導師定乜，然之後去勻咁多個補習網apply囉，點知真係比我搵到一單返黎做，仲要係女學生。

但係經過依件事之後，我真心覺得男導師嘅權益都應該得到保護。

一開始收到個case啦，都覺得幾荀嘅，始終上門地方近，價錢又有返咁上下，都冇特登諗會遇到咩學生，出黎撈左一段時間，學生基本上唔太癲正正常常我都okay。不過學生係點都好，我都係照教姐，冇乜野嘅，但今次個情況有少少唔同，個問題唔係學生到，而係個家長。

學生阿媽畀說話我聽阿爸爆門而入

第一堂上到學生屋企，見到佢地一家四口都係到，除左細佬好趣緻同埋學生有啲怕醜之外，已經feel到佢地父母好似唔係咁友善，一入到黎就對我上下打量，雖然我個日係著得mk少少姐，都唔洗咁呀，搞到我好似做錯左啲咩咁，個下條氣唔係幾順，我忍，話晒我都係打份工姐。

學生屋企唔算好大，個廳勉強容納到4個人，阿爸同阿媽兩個人坐左係張梳化，細佬就坐左係地下玩，個廳已經冇乜位剩，如果係到教嘅話我應該要收返4個人嘅學費，好彩阿媽都識做，叫我地入去學生間房到補。

「家姐，同阿sir入房補啦。」阿媽指向房門，之後細細聲補多句「小心啲呀。」佢個下真係驚死我聽唔到咁。冇計，男導師真係原罪，雖然想出聲澄清下，不過最尾我都係忍住，反正清者自清，求其入左房就算，拿拿聲補完閃水，做得服務業預左受氣架啦。

入左房，關左門，咁我就叫個學生拎本書出黎，比我睇下佢學到啲咩。望左幾眼之後，我就叫個學生試下做幾條題目，比我睇下佢嘅程度去到邊。做到一半突然間道門「砰」一聲，學生阿爸破門而入，做咩呀？拍「烈火雄心」呀，要爆門救人呀？個下我同個學生都O左，唔係呀嘛，補個習，洗唔洗咁呀，真係驚我食左你個女咩。個老豆望左幾秒，見到我同學生都好正經咁係到補緊習，指住我，喝左句「繼續補習！」之後就砰門走左。

補習阿sir係原罪？

喂大佬，男導師姐，唔洗咁樣呀，真係火都黎，好似一定會騷擾你個女咁。你地咁鍾意女導師咪揀女導師囉，而家我上到黎補都係到句句疾住晒，而家得罪你咩？男導師呢個身份去補習好似係原罪咁，尤其是對住女學生，多得網上啲媒體日日都係到渲染男補習老師就係呃蝦條同抽水，搞到今時今日男導師冇晒地位！男導師都有專業操守同師德架，唔好下下都標籤我地做色魔啦。衷心希望各位家長同學生唔好再戴有色眼鏡去睇男導師。